Австрија воведе построги правила за социјално дистанцирање и носење маски, а локдаунот е продолжен до 7 февруари. Себастијан Курц рече дека се надева дека ситуацијата ќе се врати во нормала до летото.
„Новите правила не прават никого среќен и сите се сè само не популарни, но сепак се неопходни, дури и ако на сите им е веќе преку глава“, рече Курц вчера.
Од 25 јануари, Австријците ќе мора да носат маски FFP2 (исто како KN95, N95 или P2 во другите делови на светот) во супермаркети, аптеки, бензински пумпи и на јавен превоз. Се смета дека маските FFP2 нудат подобра заштита од ширење на инфекции во воздухот отколку поевтините хируршки маски за еднократна употреба.
„FFP2 маските што во моментов се продаваат во аптеките ќе бидат достапни по пониска цена во супермаркетите“, изјави министерот за здравство Рудолф Аншобер.
Луѓето сега ќе треба да бидат оддалечени два метра, наместо еден метар.
Курц рече дека одлуката за воведување построги правила е донесена поради новиот вид на коронавирус откриен во Велика Британија кон крајот на минатата година, но и затоа што треба да се запре ширењето на коронавирусот.
Би било несовесно да се ублажат ограничувањата сега, рече Курц, изразувајќи надеж дека со кампањата за имунизација, Австрија ќе се врати во „целосно нормално“ налето.Веста за построгите правила дојде еден ден откако околу 10.000 луѓе, многумина без маски, маршираа низ Виена, протестирајќи против блокирањето.
Медицинските власти вчера регистрираа 1.267 нови случаи на COVID-19 во Австрија, од кои 281 во Виена.
Според владата, од почетокот на пандемијата досега имало 388.719 случаи и 7.082 смртни случаи од коронавирусот во земјата.
