Трошоците за енергенси се голем товар за австриските компании, предупреди Стопанската комора, барајќи од владата да ги замрзне мрежните давачки „на минимум“ до крајот на следната година и да побара од Германија да ги укине трошоците за складирање гас во транзит.
Компаниите веќе мака мачат со високите цени на енергенсите, а од почетокот на следната година давачките ќе бидат уште повисоки, за околу 50 отсто, поради повисоките мрежни давачки и давачки за струја и гас и повисоките цени за дозволите за емисија на јаглерод диоксид, предупредија од Комората.
„Нашите пресметки покажуваат дека за компанија која троши многу енергија трошоците ќе се зголемат за 59 отсто, а за помалите за 44 отсто. Тоа е премногу“, истакна завчера Јорген Штрајтнер, директор на одделението за енергетика и политика за заштита на животната средина.
Голем дел од ова зголемување ќе имаат мрежните такси, кои во индустријата паѓаат пред сè на гасот, додаде Штрајтнер.
„Не смееме да ги заборавиме пазарните цени кои кај нас се релативно високи, особено во гасниот сектор“, вели коморски претставник за австриската агенција APA.
„Уште во март мегават час чинеше 25 евра, на почетокот на ноември бевме на 38 евра, а сега сме на 48 евра“, вели тој.
Сега на компаниите им е важно краткорочно да ги растеретат, предупредува функционерот од комората, порачувајќи ѝ на Владата дека давачките за струја и гас треба да се замрзнат најмалку до крајот на следната година.
Според комората, Владата треба да ја суспендира и паушалната стапка за енергија од обновливи извори и да ги замрзне цените на дозволите за емисија на јаглерод диоксид. Проблем се и германските такси за складирање гас во транзит, предупредуваат тие.
Од почетокот на следната година, според соопштението на здружението ТHЕ, надоместокот треба да изнесува 2,99 евра за мегават час, што значи дека ќе биде повисок за 60,7 отсто од почетокот на 2024 година.
Нејзиниот удел во цената на гасот повторно ќе изнесува шест до седум отсто, па австриската влада мора да го зголеми притисокот врз Германија и да работи на негово укинување, нагласува шефот на комората, тврдејќи дека Берлин ги прекршува прописите на Европската Унија со оваа давачка.
Германската влада веќе испратила предлог-закон до парламентот кој вклучува одлука за укинување на извозните давачки, но тој уште не е усвоен, додава Штрајтнер.
Долгорочно, австриската влада треба да усвои голем пакет мерки и да ги покрие сите компоненти на цените на енергијата за да ги намали.
„Ова е неопходно бидејќи нашите цени се, на пример, шест пати повисоки отколку во САД“, додаде тој.
