Добар половен семеен автомобил мора да биде практичен, економичен за одржување и безбеден. Популарниот сајт Carwow го одбра својот фаворит.
На листата на овој сајт се наоѓаат различни модели, прилагодени на различни потреби, а титулата ја однесе – Volkswagen Polo, за кој се наведува дека е „изненадувачки простран“.
Се истакнува дека патниците на задните седишта имаат простор за нозете и главата кој е многу сличен на оној во поголемиот VW Golf и поголем отколку кај ривали како Opel Corsa. Дополнително, багажникот не разочарува – со волумен од околу 351 литар ги надминува дури и некои модели како Škoda Fabia.
Polo можеби не е забавен за возење како Ford Fiesta, но нуди повисоко ниво на комфор и, доколку се избегнат најосновните верзии на моторот, останува поволен за експлоатација, со солидни перформанси и агилност во секојдневното возење, според стручните оцени.
Внатрешноста на Polo делува исклучително квалитетно за еден ваков модел, а комбинацијата на завршна обработка и пространост речиси го позиционира како алтернатива на Volkswagen Golf. Сите примероци доаѓаат барем со 8-инчен инфотејнмент екран на допир во сериската опрема, а можно е и доплаќање за дигитална инструмент-табла.
