MAN Truck & Bus официјално започна со производство на батерии во својот производствен погон во Нирнберг.
За време на церемонијата по повод почетокот на производството, германскиот производител на комерцијални возила со седиште во Минхен за прв пат ја најави новата фаза на проширување на производството на батерии во Нирнберг.
Покрај веќе вложените приближно 100 милиони евра во започнатиот производствен погон, во наредните години ќе бидат инвестирани дополнителни 150 милиони евра за понатамошен развој на експертизата во областа на технологијата на батерии и зголемување на длабочината на додадената вредност. Конкретно, тоа значи дека покрај комплетните пакети, кои се состојат од неколку модули, во Нирнберг ќе се произведуваат и самите модули кои комбинираат повеќе батериски ќелии за следната генерација батерии.
„Денес е историски ден за MAN. Со почетокот на производството на батерии, компанијата што го измисли дизел моторот влегува во нова ера. Исклучително сме горди на она што го создадовме овде во Нирнберг и на она што ќе продолжи да се создава“, изјави извршниот директор на MAN, Александер Власкамп.
Вкупните инвестиции во Нирнберг достигнуваат половина милијарда евра, што претставува јасна посветеност на Баварија и Германија како центар на иновации. Инвестициите ќе обезбедат околу 400 работни места во технологијата на иднината и дополнително ќе ја унапредат трансформацијата на производствениот погон.
Во фабриката на MAN во Нирнберг, батериските пакети се произведуваат во три различни формати. Едниот формат се користи во електричниот градски автобус MAN Lion's City E, додека другите два формати се користат во електричните камиони MAN eTGL, eTGS и eTGX со вкупна тежина на возилото од 12 до 50 тони. Почетокот на сериското производство на електричните камиони eTGS и eTGX во Минхен е планиран за јуни оваа година.
Во тековната фаза на развој во Нирнберг може да се произведат 50.000 батериски пакети годишно, а новата зграда M50 е проектирана за производство до 100.000 единици годишно. Електрификацијата очигледно добро го зафати и економскиот сектор.
