Електричниот теренец е „целосно промашување“, тоа се зборовите на директорот на Mercedes-Benz, а ги пренесува Motor1.
Mercedes имаше големи очекувања од електричната G-класа, верувајќи дека купувачите лесно ќе преминат на EV верзијата. Сепак, новиот извештај покажува сурова реалност.
Според германскиот лист Handelsblatt, челниците на Mercedes признале комерцијален неуспех. „Автомобилот стои кај дилерите и засега е во сферата на промашување“, рекол еден од нив чие име не се открива.
Бројките говорат сè: до крајот на април се продадени само 1.450 примероци од електричната G-класа, додека стандардната G-класа со бензински и дизел мотори оствари 9.700 испораки.
Причините се јасни: електричната верзија е значително поскапа, има помала носивост (415 кг) и нема кука за приколка.
„Луѓето сакаат вистински Geländewagen со шест или осум цилиндри“, признал друг директор.
Mercedes најавува дека до 2030-тите ќе нуди и електрични и бензински верзии, препуштајќи го изборот на купувачите.
