Volkswagen го претстави Polo Edition 50, посебно издание кое ја одбележува 50-годишнината од еден од најуспешните градски автомобили. Претпродажбата започнува од денес.
Посебното издание се базира на моделот Polo Style со дополнителни карактеристики. Надворешната опрема вклучува 16-инчни алуминиумски фелни Coventry, затемнети задни прозорци и 3D ознака со натпис 50 на B-столбот. Внатрешноста ја красат натписот Edition 50 на праговите на вратите и бројката 50 на долниот дел од воланот и на црната високосјајна табла.
Возилото стандардно доаѓа со богата опрема која вклучува педали со Chrome изглед, црн кров, амбиентално осветлување, загреани спортски седишта, мултифункционален кожен волан, камера за возење наназад и пакет Park & Comfort со помошни системи како Side Assist и Park Assist. Исто така, има Discover Media инфо-забавен систем и можност за избор на профил на возење.
Опционалниот Plus пакет нуди панорамски кров, двостепен автоматски клима уред и систем за безжично заклучување Keyless Access.
Новото издание е достапно во три погонски варијанти: основен модел со мотор од 70 kW (95 КС) и рачен менувач, како и две варијанти со мотори од 70 kW (95 КС) и 85 kW (116 КС) во комбинација со седумстепен DSG менувач. Во Германија, славеничкиот Polo е достапен од 28.200 евра.
