Volkswagen ќе престане со производство на кабриолет верзијата на моделот T-Roc во 2025 година, со што ќе заврши 75-годишната традиција на кабриолетите на Volkswagen со мотор со внатрешно согорување.
Директорот за развој, Каи Груниц, ја потврди веста, наведувајќи дека компанијата го пренасочува развојот на нови модели од традиционалните бензински и дизел мотори кон електрични платформи.
T-Roc Cabriolet беше лансиран во 2020 година како индиректен наследник на моделот Golf Cabrio. Последен пат беше освежен во 2023 година и се продава со два бензински мотори: трицилиндарски 1.0 TSI со 110 КС и четирицилиндарски 1.5 TSI со 150 КС.
Одлуката доаѓа во време кога продажбата на кабриолети и роудстери се намалува на глобално ниво во сите клучни региони.
Првиот кабриолет на Volkswagen беше легендарниот „Буба Кабрио“, произведен во 1949 година од германскиот Karmann. Останал во понуда низ неколку генерации до 1980 година.
Кабрио верзиите на Golf постоеја и во четвртата генерација (1998–2002) и во шестата генерација (2011–2016), а T-Roc Cabriolet беше последниот претставник на оваа линија досега.
