Некои сметаат дека во Renault се мачат со креативноста, а некои дека ретрото во нова модерна верзија е во мода, а францускиот бренд одлично се снаоѓа на таа сцена. Renault 5 се врати и стана европски автомобил на годината, а потоа пристигна и „четворката“.
Сега Renault претставува нов концепт кој најавува нова, поробусна верзија на електричниот кросовер модел. Ако ваквиот план се оствари, R4 ќе добие погон на сите тркала и два електромотори. Што значи тоа, најдобро зборува името – R4 Savane, со кое се оддава почит на една од најпознатите верзии на оригиналната „четворка“.
Најголемата новина кај концептот е додавањето на втор електромотор на задната оска, со што се овозможува погон на сите тркала. Ако на сето тоа додадеме дека шасијата е подигната за дополнителни 15 мм и дека трагата на тркалата е проширена, јасно е дека промотивните фотографии укажуваат на авантуристичкиот дух на автомобилот.
Renault со концептот претставува и нова нијанса на каросеријата – Jade Green, а наместо стандарден покрив, има мек текстилен покрив со принт. Браниците, испечатени со 3D технологија, се поробусни и имаат способност да апсорбираат енергија при удар. Конечно, тука се и специјално дизајнираните 18-инчни бандажи со гуми Goodyear UltraGrip.
Француските дизајнери се посветиле и на внатрешноста. Седиштата се обложени со темнокафена ткаенина со впечатлив пепитo дезен на наслоните и страничните делови. Кафеавите тонови продолжуваат и на контролната табла.
На пазарот, Renault 4 E-Tech е достапен со еден електромотор, преден погон и избор на моќност помеѓу 118 и 148 КС. Со вградување на дополнителен мотор, моќноста може да порасне до 300 КС – речиси десетпати повеќе од оригиналниот модел од 1961 година.
Renault сѐ уште не потврди дали Savane ќе влезе во сериско производство, но најавуваат дека овој концепт покажува што сѐ е можно на платформата AmpR Small, која ја користат и новиот Renault 5 E-Tech и спортскиот Alpine A290.
Ова не е првиот обид на Renault да ја прикаже „четворката“ во оф-роуд издание. Неколку години пред да биде претставена сериската верзија, концептот 4ever Trophy веќе навести дека би можела да постои повеќе авантуристичка варијанта.
Во секој случај, станува збор за многу интересен концепт кој многумина би сакале да го видат во слободна продажба.
Ако навистина добие зелено светло за производство, овој модел ќе има повисока цена од стандардниот Renault 4 со поголема батерија, кој во Франција се продава по почетна цена од 31.490 евра, со вклучен еколошки бонус од 2.000 евра. Во превод – заборавете дека Renault 4 некогаш повторно ќе биде „народен автомобил“.
