Бројот на регистрации на електрични возила го надмина бројот на регистрирани возила на дизел.
За прв пат во историјата, бројот на регистрации на електрични возила во Европа го надмина бројот на регистрации на дизел автомобили.
Во 2015 година „дизелашите“ сочинуваа 50% од пазарот, а денес е само 12%. Се чини дека електричните автомобили наскоро ќе ги надминат сите класични возила со мотори со внатрешно согорување.
Според податоците на Европската асоцијација на производители на автомобили (ACEA), бројот на нови регистрации на електрични возила во Европската Унија за прв пат го надмина бројот на регистрации на дизел автомобили во 10-месечниот период од тековната година. Ова значи дека електричните возила сега се третиот најпопуларен избор зад бензинските и хибридните автомобили.
Минатиот месец, регистрациите на електрични автомобили се зголемија за 36,3 отсто во споредба со октомври 2022 година на 121.808 единици, додека пазарот на автомобили на дизел продолжи да опаѓа. Заклучно со октомври, вкупниот број на нови регистрирани ЕВ во ЕУ изнесува 1,2 милиони, што е огромен пораст од 53,1% во однос на минатата година.
Ако го погледнеме периодот во првите 10 месеци од оваа година, електричните автомобили во Европа заземаат 14% од пазарот. Ако го споредиме овој резултат со дизел автомобилите, кои сочинуваат само 12%, ќе видиме дека возилата со батерии веќе прескокнале една пречка. Од друга страна, „дизелашите“ бележат значително намалување во однос на 2015 година, кога бројот на возила со погон на „нафта“ учествуваше со дури 50% од пазарниот колач.
Хибридните автомобили исто така забележаа значителен раст на продажбата. Со 2,2 милиони нови регистрации во ЕУ, во периодот јануари-октомври, хибридите реализирале поголем број на регистрации за 29,8% во однос на истиот период лани. Напротив, популарноста на plug-in хибридните модели на европскиот континент е во постојан пад поради „избивањето“ на субвенции за овој тип возила. Нивната продажба падна на само 72.002 регистрирани единици минатиот месец, што резултираше со пазарен удел од 8,4% на годишно ниво.
Ако ги погледнеме лидерите и рекордерите, предничат автомобили со бензински мотори. Сепак, во првите десет месеци оваа категорија падна од 35,4% на 33,4% во однос на истиот период лани. Со други зборови, дизелските и традиционалните бензински автомобили се чини дека полека, но сигурно го отстапуваат местото на новиот бран хибридни и електрични возила, без разлика дали тоа им се допаѓа на луѓето или не. За потсетување, Парламентот на Европската Унија изгласа забрана за продажба на сите нови автомобили кои испуштаат CO2 од 2035 година.
