Најголемиот НФЛ играч на сите времиња, Том Брејди, го освои својот седми Супербоул и се одвои од сите останати, додека неговата Тампа Беј Баканирс го надигра актуелниот шампион и фаворит Канзас Сити Чифс со високи 31:9.
Иако актуелниот шампион во натпреварот влезе како голем фаворит, Супербоулот отиде тотално на спротивна страна. Во својата 44-та година Том Брејди и во првата сезона откако го напушти Њу Ингланд Петриотс продолжи онаму каде што застана и со одличен настап испиша нова незаборавна приказна.
Имаше помош и од останатите во тимот на Баканирс бидејќи сите делуваа речиси совршено на зелениот терен, а особено одбраната. На спротивната страна во сенка на големиот мајстор остана перфектното трио на Канзас Сити - Патрик Махоумс, Трејвис Келси и Тајрик Хил.
Уште на полувреме Баканиерс покажаа дека пехарот нема да ја напушти Флорида, каде и се играше финалето. Брејди го заврши првиот дел овозможувајќи му на Браун да направи тачдаун, трет вечерта, за 21:6 на полувреме.
Во вториот дел немаше промена, а Брејди го заврши финалето со совршен скор од 3 тачдауни, без пресечено додавање и со 21 од 29 комплетирани пасови. По петти пат во својата кариера беше прогласен за МВР на еден Супербоул.
И покрај пандемијата, на „Реј Џеј“ стадионот во Тампа беа присутни 24.835 гледачи, американската химна ја испеаја Ерик Чрч и Џезмин Саливен, а на полувремето настап оствари и бендот „the Weeknd“.
Поради кризата можеби стадионот остана неисполнет, но затоа носителот на ТВ правата CBS за да им овозможи на гледачите крај малите екрани одличен поглед преносот го вршеше со неверојатни 120 камери.
За Тампа Беј ова е втор Супербоул триуф и тоа од два обида, а прв по оној пред 18 години во сезоната 2002. Канзас Сити ја бркаше својата трета титула, но го заработи вториот пораз во вкупно 4 финалиња.