Барселона од понеделник ги започнува подготовките за новата сезона.
Раководството на клубот им порача на четворица играчи дека не мора да доаѓаат на почеток, туку имаат уште една недела за да најдат нов клуб, објави Mundo Deportivo. Тие наведуваат дека тоа се однесува на Оскар Мингес, Семуел Умтити, Рики Пуџ и Мартин Брејтвејт, при што последниот има повеќе слободни денови поради настапот за Данска и секако подоцна би се вклучил во тренинзите.
Тренерот Чави веќе им порача дека нема да смета на нив. Се верува дека ниту еден играч нема да му прави проблеми на каталонскиот клуб. Потрагата по нови клубови е веќе во тек. Mundo Deportivo истакнува дека заминувањето на четворицата на турнеја низ САД може да ги отежни преговорите со потенцијалните нови клубови.
Да потсетиме, се чини дека Френки де Јонг ќе ја напушти Барселона и ќе замине во Манчестер Јунајтед. Од друга страна, веќе со недели трае големата трансфер сага за доаѓањето на Роберт Левандовски, кого Баерн не сака да го пушти лесно.