Sport Mediaset тврди дека наводно Реал Мадрид пред нос ќе ѝ го земе Лаутаро Мартинес на Барселона откако испратил понуда вредна 100 милиони евра до миланскиот клуб.
Аргентинскиот напаѓач е мета на Барселона веќе година дена, но постои можност битката на крајот да ја добие кралскиот клуб и лут ривал на каталонскиот тим. Барселона се ценкаше, ја намалуваше цената вклучувајќи играчи кои Интер не ги сакаше, а одбиваше да ги вклучи оние кои „Нераѕурите“ ги бараа, па договор никогаш не беше ни блиску.
Затоа, пак, Реал Мадрид бил далеку поконкретен и испратил понуда од 100 милиони евра, тврди Sport Mediaset. Медиумот вели и дека „Кралевите“ веќе ги договориле деталите со Лаутаро кој во Мадрид би заработувал 8 милиони евра годишно.
Доколку трансферот навистина се реализира, се очекува потоа Интер да ги искористи парите за да тргне по Н'Голо Канте од Челси за кого „Сините“ бараат 50 милиони евра.
