Тинејџерот напаѓач е новата голема надеж за тимот од „Камп Коу“ за што говори и вртоглавата сума која Барса ја стави како откупна клаузула во неговиот договор.
Се вика Густаву Маја да Силва и е непознат за фудбалските фанатици на Стариот Континент. Но, скаутите на Барселона пресметале дека тој е идна ѕвезда, па Каталонците веднаш се пазарија со неговиот клуб Сау Паулу. Трансферот не е воопшто скап со оглед на тоа што Бразилците добија само 4,5 милиони евра.
Надежниот напаѓач, сепак, прво ќе игра во вториот тим, односно Барса Б. Но, дека Каталонците имаат големи очекувања од него говори фактот дека во 5-годишниот договор Маја има откупна клаузула од цели 300 милиони евра.
„ФЦ Барселона се договори со Сау Паулу за трансферот на Густаво Маја за во Барса Б. Репрезентативец на Бразил во У16 и У17 репрезентациите, тој е брз и подвижен крилен напаѓач кој обично игра по левата страна, иако е деснак. Добар е во дриблинзите, и во оние од место и во оние при трчање, а има и силен шут што го прави многу опасен“, објави клубот на својата официјална веб-страница.
Роден е во главниот град Бразилија на 22 јануари 2001 година, а на гигантот Сау Паулу му се приклучил на 14-годишна возраст. Најдобрата сезона му била во 2018 кога во младинските категории на 36 натпревари постигнал 30 голови.
