Членовите на белградската иницијатива „Улици за велосипедисти“ организираа герила акција низ главниот град на Србија со цел да ги поттикнат сограѓаните почесто да возат велосипед.
Акцијата беше спроведена во рамките на овогодишната Недела на мобилност, со надеж дека белграѓани ќе изберат да возат велосипед како основно превозно средство наспроти автомобил или автобус.
Членовите на иницијативата покажаа креативни, симпатични и напати хумористични транспаренти со пораки како „Баш си сладок, штета што си во кола“ и „Не си во гужва, ти си дел од гужвата“, за да го свртат вниманието на своите сограѓани и да ги потсетат дека освен што е здраво, возењето велосипед придонесува за поздрава животна средина и одржување на физичка дистанца во секојдневниот транспорт во време на пандемија.
Она што како поука можеме да го извлечеме од оваа позитивна акција, покрај тоа што и самите ќе ги примениме апелите од пораките на белграѓани, е и самите да организираме вакви герила-акции за нашите сограѓани и на забавен начин да им ја доближиме велосипедската култура.
Погледнете ги нивните интересни пораки низ фотографиите на Јадранка Илиќ.