Баскиската социјалистичка партија Sortu, која се залага за отцепување од Шпанија, упати честитки до нивната идеолошки братска македонска партија, Левица.
Sortu, односно Создавање, постои од 2011 година и произлегува од злогласната ЕТА со таа разлика што Sortu ја формираат луѓе на ЕТА кои се против насилството. Во баскискиот Парламент има 12 од можни 75 пратеници, а во Шпанскиот Сенат има едно место.
„Другари,
во име на жените и мажите од баскијското движење за независност ви честитаме на резултатот на изборите одржани на 15 јули 2020.
И покрај потешкотиите со кои се соочивте во минатото, постигнавте одличен успех. Благодарност за вашата поддршка кон Баскија и се надеваме дека ќе продолжи нашата соработка“, стои во порака.
„Благодарност до баскиските левичари од Sortu за честитките по повод изборниот резултат на Левица“, се заблагодарија од Левица која за првпат влезе во македонскиот Парламент.
Левица отворено го поддржува правото на баскискиот народ за самопределување и за остварување на вековниот сон, создавање на слободна и независна држава Баскија.