Едногодишните бебиња можеби сѐ уште не знаат да зборуваат, но се способни да размислуваат логички, тврди ново истражување кое ја проучуваше најраната возраст на која луѓето почнуваат да размислуваат.
Легендарниот психолог Жан Пјаже сметаше дека луѓето немаат способност логички да размислуваат додека не наполнат 7 години.
Сега, научници спроведоа истражување кое беше објавено во магазинот Science, преку кое докажаа дека бебињата можат да размислуваат уште од најрана возраст. Ова истражување беше направено преку испитување на 48 бебиња, а беше откриено дека тие размислуваат преку процес на елиминација.
Размислувањето преку процес на елиминација е познато и како „логички силогизам“ и функционира на следниот начин: ако А и Б може да се вистинити, а се знае дека А е лажно, тогаш Б мора да е вистинито.
„Не мора да значи дека процесот на елиминација е најраната форма на размислување, но е клучен дел од развојот на мислата во иднина. Една од најважните работи која ги одвојува луѓето од сите други живи форми на светот е можноста да ја препознаат негативната опција – ако видите дека А е лажно, тогаш вистинскиот одговор е некој друг“, вели Џастин Хаберда, психолог на Универзитетот „Џон Хопкинс“.
Во истражувањето на бебињата им беа покажувани по две слики, потоа бебињата беа ставени позади параван, па научниците отстрануваа една слика и повторно му покажуваа на бебето пар од две слики. Со проучување на движењата на очите, научниците заклучија дека бебињата повеќе се фокусирани на сликата која останала таму од претходниот пар, па затоа тврдат дека тоа се должи на логичното размислување.
