Белами е нов селектор на Велс

Крег Белами е назначен за нов селектор на репрезентацијата на Велс, соопшти денеска Фудбалската асоцијација на Велс (ФАВ). Во соопштението за медиумите се наведува дека Белами потпишал договор до јуни 2028 година.

На велшкото селекторско столче на го менува Роберт Пејџ, кој беше отпуштен на 21 јуни.

„За мене е неверојатна чест што добив можност да ја водам мојата земја. Тоа е најгорд момент во мојата кариера. Мојата цел отсекогаш била да бидам селектор на Велс, подготвен сум за предизвикот“, рече Белами.

Новиот селектор на Велс во кариерата самостојно беше тренер на младинскиот тим на Андерлехт, а минатата сезона беше во стручниот штаб на Барнли како помошник на Венсан Компани. Во својата кариера настапуваше за Норич Сити, Ковентри Сити, Њукасл Јунајтед, Селтик, Блекбурн Роверс, Ливерпул, Вест Хем Јунајтед, Манчестер Сити и Кардиф Сити.

За репрезентацијата на Велс од 1998 до 2014 година настапи на 78 натпревари и постигна 19 голови. За малку не ја дочека ерата кога Велс почна да игра на големите натпреварувања, па во кариерата ќе му остане само настапот на Олимпијадата 2012 со репрезентацијата на Велика Британија. Само две години по пезнионирањето, Велс се пласираше на ЕУРО 2016.

Белами ќе дебитира како селектор на Велс на 6 септември дома во Кардиф на мечот против Турција во Лигата Б од Лигата на нации.

На 13 јули Белами ќе полни 45 години.