Белгиската агенција за лекови информираше дека се регистрирани два смртни случаи во земјата по вакцинација со AstraZeneca, смртта најверојатно се должи на вакцината, јави дописничката на МИА од Брисел.
Агенцијата секој четврток ја информира јавноста за несаканите дејствија од лековите и вакцините.
За првпат денеска се регистрирани две починати лица откако примиле доза од AstraZeneca.
Агенцијата порача дека нивната смрт најверојатно е поврзана за вакцината. Најчести нуспојави регистрирани во Белгија во вакцинацијата се покачена телесна температура, болки во мускулите и реакција на местото каде е примена вакцината.
Овие несакани дејствија најчесто се појавуваат по втората доза со вакцините на Pfizer и Moderna, и по првата доза со AstraZeneca.
Од сите 14.601 пријавени случаи на несакани појави, белгиската агенција смета дека 3.077 се сериозни.
Регистрирани се вкупно 126 смртни случаи, но само последните два се сметаат за поврзани со вакцината. Во Белгија досега речиси четири милиони граѓани примиле барем една доза вакцина.