Дури и по една година од борбата со смртоносниот вирус SARS-CoV-2, сè уште има многу работи кои треба да ги дознаеме за болеста COVID-19 и долготрајните ефекти по здравјето на луѓето кои ќе ја прележат.
Неодамна, докторката Британи Бенкхед-Кендал од Тексас, која има третирано илјадници КОВИД пациенти, сподели значајни резултати од болеста и последиците од неа, споредувајќи три рендгенски слики. Едната е од здрав пациент, другата е од пушач, а третата е од пост-КОВИД пациент.
На Twitter таа објави рендгенски снимки, објаснувајќи дека белите дробови на луѓето кои прележале COVID-19 изгледаат полошо отколку кај пушачите.
„Сè уште има луѓе кои велат дека се чувствуваат добро, дека немаат здравствени проблеми, но нивните рендгенски снимки на белите дробови не го кажуваат тоа. Можеби немаат проблеми сега, но тоа не значи дека во иднина нема да се појават“, објаснува таа.
Од снимките, кај здравиот човек белите дробови се чисти и на снимката се црни, што го обележува воздухот во нив. Белите дробови на пушачот имаат бројни бели линии, што ги покажуваат лузните и запушувањето, додека белите дробови кај пациентот кој прележал корона се скоро целите бели.
