Поранешниот предводник на Интер и Наполи, Рафаел Бенитес, ги гледа Интер и Јувентус како главни фаворити за освојувањето на Скудетото сезонава.
„Интер и Јувентус се први фаворити. Солиден е и Милан, невозможно е да не го рачунате за кандидат и шампионот, но другиве две екипи во моментов се посупериорни“, рече тој за La Gazzetta dello Sport.
„Ги ценам засилувањата на Јуве, Ди Марија и Бремер. Исто така треба да се внимава на Наполи, а импресивно изгледа и Рома со новите засилувања. Мислам дека Мурињо има обврска да се бори за титулата“, додаде популарниот Рафа.
Рома навистина осетно се засили летово со доведувањето на Пауло Дибала, Џорџињо Вајналдум и Немања Матиќ.
Милан, од друга страна, имаше мирно лето со тоа што најзвучното име кое го донесоа е Шарл Де Кетеларе.
Интер се надева дека враќањето на Ромелу Лукаку ќе ја направи посакуваната разлика во борбата за Скудетото.
Бенитес моментално е слободен на пазарот на тренери откако годинава го напушти Евертон. Во Италија имаше неславна авантура во Интер во 2010 од јуни до декември, а од 2013 до 2015 го предводеше Наполи.
