Реал Мадрид соопшти дека голгетерот Карим Бензема излегол позитивен на тестирањата за COVID-19 и не може да ги почне подготовките за новата сезона.
Проблеми за Кралскиот клуб и новиот тренер Карло Анчелоти во предсезонскиот период. Тимот се екипира за да ги почне подготовките за новата сезона 2021/22, но тоа ќе мора да го направи без повратникот во француската репрезентација, Карим Бензема.
„Реал Мадрид потврдува дека играчот Карим Бензема излезе позитивен на тестирањата за COVID-19“, кратко објави мадридскиот гигант.
Бензема веднаш е ставен во самоизолација и нема да може да тренира под палката на Анчелоти сѐ додека не добие негативен тест.
Тој и онака касно се врати во клубот поради дополнителниот одмор кој го доби поради настапот со Франција на ЕУРО 2020. Сите фудбалери кои настапија на континенталното првенство според правилата на ФИФА смеат подоцна да се приклучат на клупските подготовки, за и тие да добијат заслужен одмор.
Реал веќе в недела игра пријателски натпревар против Ренџерс на „Иброкс Парк“ во Глазгов, а на 8 август има закажано пресметка со Милан. Новата сезона во Примера почнува на 14-ти кога Реал му гостува на Алавес.