Реал Мадрид синоќа загуби од Манчестер Сити во првото полуфинале од Лигата на шампионите, но вниманието го привлече Карим Бензема кој постигна два гола, а особено ефектен беше пеналот при кој мајсторски ја изведе познатата паненка.
Во 82. минута од натпреварот при водство на „Граѓаните“ од 4:2 Бензема ја презеде одговорноста да го изведе ударот од белата точка, откако Емерик Лапорт играше со рака во казнениот простор. Иако ударот беше премногу важен поради конечниот резултат пред реваншот, бидејќи иако се работи за пораз не е исто кога треба да се брка еден или два гола, Бензема се одлучи да ризикува со популарниот удар кој на ЕУРО 1976 година во Белград на светот му го претстави Чехот Антонин Паненка, во чија чест и и именуван ударот. Го изведе мајсторски, а домашниот голман Едерсон воопшто не ни помисли дека Французинот ќе направи такво нешто, и беше совладан. Ваков удар колку и да е добро изведен е лесна топка за голманите доколку останат во место.
„Секогаш во глава ми е мислата дека доколку не изведуваш пенал, нема никогаш да промашиш пенал. Тоа е ментална самодоверба, ништо повеќе. Јас имам голема доверба во себе, затоа го направив тоа, и излезе добро“, објасни Бензема во изјава за новинари.
Бензема презеде таков ризик и покрај тоа што беше во серија од два промашени пенали за Реал. Затоа стигна и пофалба од тренерот Карло Анчелоти кој изјави и дека не знаел дека Бензема ќе шутира паненка.
„Мислам дека направи промена бидејќи последните два пенала не му беа добри. Вежбаше на тренинзи, но не знаев на кој начин ќе го изведе. Ете ја одбра паненката и ја изведе навистина добро, покажувајќи силен карактер. Не е лесно во полуфинале од Лига на шампиони да шутнеш пенал на таков начин“
