Најбогатиот човек во светот, Џеф Безос, понуди да ги покрие трошоците на НАСА во износ од две милијарди долари, така што американската вселенска агенција ја преиспита можноста со него да потпише договор за изградба на возило за слетување на Месечината.
НАСА во април тоа му го довери на Илон Маск и неговата компанија SpaceX, одбивајќи ја понудата на Blue Origin на Безос. Договорот предвидува изградба на систем за слетување кој би носел астронаути на површината на Месечината најрано во 2024 година.
Иако се очекуваше дека двете компании ќе можат да учествуваат во проектот, Агенцијата, поради недостаток на средства, можеше да додели договор на само една. Сега Безос бара уште прилика да се натпреварува со SpaceX.
НАСА доби само 850 милиони долари од 3,3 милијарди долари што ги побара од Конгресот на САД, за изградба на возило за на Месечината.
Во отворено писмо до администраторот на Агенцијата, Бил Нелсон, Безос вели дека Blue Origin ќе го надополни недостатокот во буџетското финансирање со откажување од сите плаќања во износ од две милијарди долари.
НАСА засега не се огласи по ова барање на Безос.
