Основачот на Microsoft и филантроп Бил Гејтс ги коментираше теориите на заговор за вакцинирањето поврзани со него и нагласи дека е тешко да се демантираат бидејќи се „премногу глупави“.
Bussines Insider пишува дека станува збор за „теории“ според кои милијардерот стои зад намерата преку вакцини да им се вградат микрочипови за следење на луѓето.
„Никогаш не сум се занимавал со никаков вид на микрочипирање. Речиси е невозможно да се коментираат и демантираат ваквите работи бидејќи се премногу глупави и испревртени“, рече Гејтс.
Тој со години зборуваше за опасностите од пандемии и во 2016 година ги предупредуваше светските лидери, вклучувајќи го американскиот претседател Доналд Трамп, советувајќи го да преземе посериозни мерки за подготовка за вакво сценарио.
Една година претходно го одржа познатото излагање на TED Talk во кое предупреди на потенцијално огромниот број жртви во случај на пандемија.
Фондацијата Бил и Мелинда Гејтс вложи 300 милиони долари во борба против коронавирусот, а за некои десничарски групи тоа беше повод во јануари да почнат да шират дезинформации дека „Бил Гејтс е виновен за создавањето на вирусот и сака да профитира од пандемијата“.
„Добро е да знаеме кои деца се вакцинирани против сипаници, а кои не се. Треба да се направи систем на здравствени податоци за да им се помогне на здравствените работници да утврдат кој е имунизиран. Но, тоа нема никаква врска со микрочипирање. Нашата фондација дава пари за вакцини и токму затоа можевме да го забележиме ризикот од пандемија и да зборуваме за тоа“, нагласи Гејтс.
Сепак, теориите на заговор поврзани со коронавирусот и Бил Гејтс дополнително се раширија „благодарение“ на социјалните медиуми и некои телевизиски станици. Спомнати се 1,2 милиони пати од февруари до април, според податоците кои ги објави New York Times.
Според резултатите од истражувањето што го спроведоа YahooNews и YouGov кон крајот на мај, 28% од анкетираните сметаат дека овие теории на заговор се точни.
Исто така, 44% од републиканците и 50% од луѓето кои гледаат Fox News во САД сметаат дека овие теории на заговор се точни. Од друга страна, 61% од луѓето кои гледаат MSNBC сметаат дека овие теории на заговор е лажни вести.
На прашањето како ги коментира ваквите резултати од истражувањето, Гејтс рече дека тоа „е по малку загрижува“, но додаде дека тоа не ги спречило владите и други групи ширум светот да финансираат истражувања за развој на вакцина против коронавирусот.
Тој изразува загриженост дека кога ќе се добие вакцината против коронавирус, антиваксерите би можело да го отежнат создавањето на „имунитет на стадо“.
Гејтс исто така нагласи дека кога ќе биде направена вакцината треба да им биде првенствено доделена на земјите со послабо развиен здравствен систем и места каде е тешко да се одржува потребната физичка дистанца.
„Светот мора да работи заедно за да се развие сигурна и ефикасна вакцина. Мора да се осигураме дека произведената вакцина ќе стигне прво до оние на кои им е најптребна, а не до оние кои ќе платат најмногу“, порача Гејтс.
„По малку сум изненаден што се толку фокусирани на мене. Ние само саваме пари, го потпишуваме чекот... и да, мислиме на тоа да ги заштитиме децата од болести, но тоа нема врска со чипирање и такви работи. Понекогаш ти доаѓа да се изнасмееш“, изјави Гејтс за BBC.