Многу заразната варијанта на SARS-CoV-2 идентификувана во Велика Британија, не предизвикува сериозни заболувања кај хоспитализирани пациенти, покажува новата студија објавена во медицинското списание Lancet.
Сојот познат како B.1.1.7 беше откриен во Велика Британија кон крајот на минатата година и стана најчест во САД, според американскиот Центар за контрола и превенција на болести (CDC).
Во студијата објавена вчера во угледното списание, анализирана е група од 496 пациенти примени во британските болници во ноември и декември минатата година и се споредуваат резултатите кај пациентите заразени со B.1.1.7 или други варијанти.
Истражувачите откриле дека нема разлика во ризикот од тешко боледување, смрт или други клинички резултати кај пациенти заразени со B.1.1.7 или другите варијанти.
„Нашите податоци, со сите постојни ограничувања затоа што се работи за real-world study, даваат првични уверувања дека тежината на боледувањето кај хоспитализирани пациенти заразени со сојот B.1.1.7 не е значително различна од тежината на болеста кај оние кои се заразени со други варијанти“, велат истражувачите.
Друга студија објавена во списанието за јавно здравје Lancet тврди дека вакцините најверојатно ќе бидат ефективни против британската варијанта со оглед на тоа што нема очигледно зголемување на стапката на повторна инфекција во споредба со другите варијанти.
Според британските научници, британската варијанта е околу 40-70 проценти позаразна од претходните доминантни варијанти.
Студијата исто така ги потврдува претходните откритија дека варијантата B.1.1.7 e позаразна.