Италијанскиот новинар Фабрицио Романо објави информација дека Борусија Дортмунд нема ништо против продажба на својот најдобар играч Џејдон Санчо, но дека ниту еден клуб нема да добие попуст поради состојбата со коронавирусот.
Вредноста на 20-годишниот крилен напаѓач се проценува на 130 милиони евра, а иако речиси сите економски експерти најавуваат пад на вредноста на светските фудбалери, Борусија нема намера да ја спушти цената на своите играчи.
Романо тврди дека германскиот клуб им испратил порака на сите заинтересирани клубови дека Санчо нема да го напушти тимот за помалку од 110 милиони евра, односно дека нема да добијат попуст поради пандемијата со COVID-19 која сигурно ќе ја смени ситуацијата на фудбалскиот пазар.
Талентираниот Англичанец одамна е на мета на Манчестер Јунајтед од каде веќе преговараат со неговиот агент, а „Црвените ѓаволи“ се „предупредени“ дека Борусија нема да го пушти својот најдобар играч за помалку од 110 милиони евра.
Санчо беше дел од У-17 репрезентацијата на Англија која во 2017 година го освои Светското првенство, а истата година направи трансфер од Манчестер Сити во Борусија Дортмунд за 8 милиони евра.