Борусија од Дортмунд објави дека го отпуштила тренерот Нури Шахин по синоќешниот пораз од Болоња во Лигата на шампионите.

Синоќа Борусија загуби во Италија со 2:1 во претпоследното коло во Лигата на шампионите и значително ги намали шансите за завршување на натпреварувањето меѓу осумте најдобри екипи кои директно ќе се пласираат во осминафиналето.
Згора на сѐ, поразот од Болоња беше со пресврт откако Бортусија водеше со 1:0 со голот од пенал на Серху Гираси во првиот дел, а фуриозните две минути на „Рособлу“ од 71. до 72. минута резултираа со голови на Тајс Далинха и Семјуел Илинг Џуниор за прва историска победа на Болоња во Лигата на шампионите.
36-годишниот Сахин на почетокот од оваа сезона седна на клупата на великанот од Дортмунд, а на 27 натпревари во сите натпреварувања оствари 12 победи, 4 нерешени и 11 порази.
Поразот од Болоња беше четврти по ред за Борусија во сите натпреварувања, а на челниците на тимот од Дортмунд не им преостана ништо друго освен да му врачат отказ.
„Се надевавме на долгорочна соработка со Шахин бидејќи многу го цениме, верувавме до крајот дека може да ја сврти ситуацијата, но по четири последователни порази и само една победа во последните 9 натпревари ја загубивме вербата дека може да ги исполни целите за оваа сезона. Ние сме на само 10-тото место во Бундеслигата, па со тешко срце решив да ја прекинам соработката со Шахин“, изјави спортскиот директор на клубот, поранешната клупска легенда Ларс Рикен.
Borussia Dortmund und Nuri Sahin gehen ab sofort getrennte Wege
— Borussia Dortmund (@BVB) January 22, 2025
Der BVB hat seinen Cheftrainer nach der enttäuschenden 1:2-Niederlage in der UEFA Champions League am Dienstagabend beim FC Bologna freigestellt.
Alle Infos:
👉 https://t.co/TufDGRXeGq pic.twitter.com/3CeC9hgAAe
„За жал, не успеав да ги исполнам спортските цели на Борусија за оваа сезона. Му посакувам на клубот сѐ најдобро во иднина“, кратко изјави Шахин.
Борусија во најбрз можен рок ќе го објави името на неговиот наследник, соопштија од клубот од Дортмунд.
По пензионирањето во 2021 година Шахин ја водеше само Анталијаспор пред да седне на клупата на гигантот од Дортмунд, каде и ја почна играчката кариера.