Манчестер Сити во првиот натпревар од четвртфиналето во Лигата на шампионите славеше со 2:1 против Борусија Дортмунд со голот на Фил Фоуден во 90-та минута.
Германскиот тим беше оштетен на 1:0 кога Џуд Белингем ја шутна топката кон невнимателниот Едерсон, но судијата свирна фаул. ВАР не се огласи бидејќи судијата Овидиу Хатеган ја прекина акцијата пред играчот на Борусија да влезе со топката во голот, па уште и му даде жолт картон на младиот Англичанец.
„На судијата му треба преглед“, изјави sвездата на Борусија, Џејдон Санчо веднаш по натпреварот.
Белингем беше особено разочаран.
„Дефинитивно сметам дека чисто ја одзедов топката. Добив фаул и картон демек високо му била крената ногата. Имаат толку многу екрани и снимаат камери, а не ме чекаа да постигнам гол, па потоа да ја погледнат ситуацијата“.
Гуардиола: Правилна одлука
Менаџерот на Сити, Пеп Гуардиола, пак, верува дека одлуката била правилна.
„Што се однесува до голот на Белингем, ногата му беше крената високо и тоа беше правилна одлука, така што немам забелешки на судењето“.