Кошаркарите на Бостон Селтикс го совладаа Мајами Хит со 127:102 на гостински терен во вториот натпревар од финалето на плеј-офот на Источната конференција и израмнија на 1:1 во серијата прв до четири победи.
Селтикс веќе водеа со 11 разлика по првата четвртина, а на полувремето имаа големи +25 (70:45).
Гостите имаа и 32 поена предност во последната четвртина, а Мајами до крајот само малку го ублажи поразот. Бостон со оваа победа дефинитивно покажа дека е сериозен кандидат за шампионскиот прстен.
Џејсон Тејтум беше најефикасен во редовите на Бостон со 27 поени, додека одличниот Маркус Смарт постигна 24 поени со 12 асистенции и 9 скока.
Кај домашениот тим најефикасен беше Џими Батлер со 29 поени, а Виктор Оладипо и Гејб Винсент дадоа по 14 поени.
Серијата Источно финале сега се сели во Бостон каде ќе се играат следните два натпревара, првиот утре, а вториот два дена подоцна.
Да потсетиме, во финалето на Западот Голден Стејт Вориорс водат со 1:0 против Далас Маверикс, а вториот натпревар е закажан за вечерва.
