Бостон направи нов чекор кон титулата, ниту феноменалната игра на Дончиќ не му помогна на Далас

Бостон Селтикс синоќа во „ТиДи Гарден“ ја оствари втората победа во финалната серија во НБА против Далас Маверикс, а резултатот на семафорот гласеше 105:98.

Крајот на натпреварот не беше толку неизвесен како што сугерира резултатот, бидејќи Бостон постигна само 2 поена во последните 3 и пол минути, а Далас немаше шанси за пресврт.

На Далас не му помогна ниту фантастичната партија на Лука Дончиќ, Словенецот кој забележа трипл-дабл со 32 поена, 11 скока и 11 асистенции, а од поле шутираше фантастични 12/21.

Кајри Ирвинг повторно потфрли во дресот на Маверикс, шутирајќи лоши 7/18 и постигна 16 поени со 6 асистенции за соиграчите.

Бостон го предводеше фантастичниот плејмејкер Џру Холидеј со 26 поени и 11 скока, Џејлен Браун постигна 21 поен, а Џејсон Тејтум беше блиску до трипл-дабл со 18 поени, 9 скока и 12 асистенции.

Сега Бостон води со 2:0 во серијата која се сели во Далас, а Маверикс ќе бидат под притисок бидејќи и еден пораз во двата меча пред домашните навивачи веројатно би значел крај на нивните надежи за шампионската титула.

Првиот нареден натпревар се игра ноќта од среда кон четврток од 2:30 часот по македонско време, а директен пренос ќе оди на Arena Premium 1.