Фудбалскиот третолигаш Башкими од Куманово објави необичен хајлајтс од нивниот натпревар од изминатиов викенд против Петровец, кој го доби со 2:0.
Поранешниот прволигапш и освојувач на пехарот од Купот на Македонија одамна е заглавен во пониските лиги. Сезонава се наметнува како еден од фаворитите за првото место и разигрување за пласман во втората лига, но добрите игри од теренот некако слабо ги префрлуваат во техничка обработка на YouTube, иако самото тоа што имаат канал на оваа социјална мрежа - е навистина за пофалба.
Башкими на YouTube објави 2 и пол минутен хајлајтс од 2:0 победата на домашен терен над Петровец. И кога човек ќе помисли дека за толку време ќе погледне шанси и голови, следува големо изненадување, да не речеме разочарување.
Во првите триесетина секунди гледачот има чест да гледа како играчите на двата тима полека излегуваат на теренот. Потоа следува редењето среде терен, поздрав кон публиката, поздравување меѓу играчите, поздравување со судиите, фрлање паричка и бирање топка или страна, за потоа судиите да се упатат секој на своето место (да, дури и тоа го има на хајлајтсот).
На точно 2 минути и 10 секунди од овој незаборавен хајлајтс главниот судија означува почеток на натпреварот, а гледачот има чест да го види и почетниот удар.
Конечно, потоа доаѓа моментот кој секој што отвора хајлајтс чека да го види - голови или шанси.
Башкими, секоја чест! Од 2 минути и 35 секунди долго видео насловено како хајлајтс, она што навистина вреди да се погледне почнува дури на 2:11 и трае само 24 секунди.
Но, техничкиот тим на Башкими не смее да се разочара! Од грешките се учи, па ги охрабруваме наредното видео да биде за вистинска пофалба.