Американскиот актер Бред Пит пристигна во Брисел за да присуствува на отворањето на изложба на неговиот пријател Томас Хаусиго.
Холивудската ѕвезда пристигна неочекувано во главниот град на Белгија од Париз, а фотографите го „уловија“ благодарение на дојава, пренесува порталот Brussels Today.
„Добивме дојава од Франција дека Бред Пит се качува на авион од Париз за Брисел... веднаш отидов од Гент за Брисел каде се потрудив да не привлечам премногу внимание за да не го внесат преку посебен влез. Малку бев под стрес, но одеднаш – ете го, се појави“, изјави фотограф на HLN за белгиското списание Qmusic, за тоа како успеал да го фотографира славниот актер.
Како што се наведува, обожаватели на Пит се собрале пред хотелот Amigo во центарот на градот, со надеж дека ќе го видат славниот актер.
Томас Хаусиго е британски визуелен уметник со интернационална слава, а пошироката јавност надвор од уметничките кругови го знае како пријателот кој му понуди прибежиште на Пит од будното око на медиумите по разводот од Анџелина Џоли во 2016 година.
