Том Брејди најави заминување во пензија, како што сам кажа „овој пат навистина“.
Со видео снимено лично од него, 45-годишниот квотербек Том Брејди денеска објави дека дефинитивно заминува во пензија.
„Добро утро на сите, веднаш ќе преминам на главното. Заминувам во пензија. За стално. Знам дека минатиот пат ова предизвика голема врева. Кога утринава се разбудив ми дојде само да го притиснам копчето за снимање и вие први да дознаете. Во пензија со толку емоции може да се замине само еднаш, а јас тоа веќе го искористив лани. Ви благодарам на сите, на секој од вас. На семејството, пријателите, соиграчите, противниците, можам вечно да набројувам бидејќи има премногу. Фала ви на сите што ми овозможивте да го живеам мојот сон. Не би менувал ништо. Ве сакам сите“, рече Брејди, споделувајќи го видеото на социјалните мрежи.
По 23 неверојатни сезони, 7 освоени Супербоул пехари и 3 награди за најдобар играч на сезоната, 5 пати МВП на Супербоул, бројни поставени и срушени рекорди, денеска завршува една ера.
Том Брејди се пензионира. Во тие 23 години (2000-2022) Брејди одигра 365 натпревари, од играч кој речиси никој не го приметуваше на драфтот стигна до статус на легенда. Влезе во драфтот во 2000 година како играч за кого клубовите сметаа дека нема светла иднина.
Њу Инглад Петриотс го прескокнаа во третата рунда на драфтот, но и понатаму беше достапен во шестата, како 199-ти. Петриотс потоа го одбраа и покрај фактот што веќе имаа на располагање три квотербека, вклучително и големиот Дру Бледсоу.
Кога прв пат го запозна сопственикот на клубот, Роберт Крафт, храбро му се претстави како „најдобрата одлука што неговата франшиза ја донела“. Брејди во Њу Ингланд остана до 2019 година и на клубот му донесе 6 Супербоул титули (2001, 2003, 2004, 2014, 2016, 2018). Последните три сезони ги мина во тимот на Тампа Беј Буканирс, со кои ја освои седмата (2020).
