Андреа Пирло и официјално стана нов тренер на Јувентус.
Италијанскиот фудбалски шампион вечеравечер потврди дека 41-годишниот Пирло потпиша договор со важност до 2022 година, откако Маурицио Сари беше сменет веднаш откако Јуве не успеа да продолжи понатаму во Лигата на шампиони.
За Пирло, ова ќе биде прво искуство во тренерската кариера со прв тим. На крајот на јули тој беше назначен за главен тренер на младинскиот тим (до 23 години) на Јувентус.
Пирло играше во Јувентус заедно со голманот Џанлуиџи Буфон кој со 42 години е постар од неговиот нов менаџер.
По официјалното соопштување на веста, Џиџи беше духовит и на социјалните мрежи напиша: „И што, сега треба да ти се обраќам со ‘господине’? Среќно во овој нов предизвик Андреа #CoachPirlo“.
И поранешниот соиграч на Пирло во Милан, Џенаро Гатузо кој сега го води Наполи, имаше интересен коментар за неговото назначување.
„Е сега се зае*ал... тоа е работата“, изјави синоќа Гатузо за Sky Italia, откако неговиот Наполи изгуби од Барселона и не се пласираше во четвртфиналето од Лигата на шампиони.
„Има среќа што почнува во Јувентус, но ова е професија во која одлична играчка кариера не е доволна. Мораш да учиш, напорно да работиш и нема да бидеш наспан“.
Пирло е светски првак од 2006 година со италијанската репрезентација. Играше за Јувентус од 2011 до 2015 година. Како дел од тимот, тој стана четирикратен шампион на Италија, го освои Суперкупот двапати и еднаш Копа Италија.