Бугарските фудбалски легенди Христо Стоичков, Борислав Михајлов и Красимир Бал'ков преку својата фондација „National94“ ќе им помагаат на настраданите во пожарот во Кочани.
Преку оваа фондација фудбалерите кои играа за Бугарија на Мундијалот 1994 година во САД ќе обезбедат средства кои ќе ги донираат.
„Нема датум и време за трагедија. После тоа остануваат само солзи и голема болка. Ние како Фондација National94 изразуваме сочувство до починатите. Фудбалот нѐ приближи до народот во Македонија и важно е да ја дадеме нашата поддршка во овој момент“, велат од фондацијата, пренесуваат бугарските медиуми.
Вчера Стоичков изрази сочувство и сподели дека му е тешко да го прифати она што се случи во соседна Македонија.
„Светот може да биде толку убав, но може да биде илјада пати пострашен! Нема ништо пострашно од смртта на младите! Нашите деца кои отидоа да се забавуваат! Очите ми се полнат со солзи кога читам и гледам вести! Господ нека е со Северна Македонија“, напиша Стоичков на Facebook.
Бугарија предводена од Стоичков, голманот Михајлов и Бал'ков постигна историски успех на Мундијалот 1994 стигнувајќи до 4. место. Претходно во полуфиналето потклекна пред Италија губејќи со 2:1 со головите на Роберто Баџо.
Тројцата настапија на пријателската во мај 1996 година во Софија кога тогаш силната Бугарија ја победи Македонија со 3:0, а Стоичков го постигна вториот гол. Стоичков и Бал'ков играа и на реваншот две години подоцна во Скопје кога со голот на Ѓорѓи Христов Македонија се реваншираше. Во август 2001 се одигра нова пријателска во Софија, а тогаш Бугарите победија со голот од пенал на Бал'ков.
