Претседавачот со ОБСЕ, македонскиот министер Бујар Османи, објави план во девет чекори за деескалација и нормализација на тензиите на северот на Косово, соопшти Министерството за надворешни работи. Планот е во насока на постигнување траен мир и стабилност на северот на Косово и враќање на косовските Срби во институциите и демократските процеси.
Како чекор I, планот превидува Косово и Србија да ја реафирмираат посветеноста кон основниот договор и Охридскиот протокол.
Чекор II, Косово да ги повлече специјалните полициски сили, а Србија да ја намали борбената готовност на вооружените сили.
Чекор III, на полицијата на Косово, заедно со силите на КФОР и ЕУЛЕКС, да им се овозможи во целост да се грижат за редот и безбедноста на земјата.
Чекор IV, протестите да се откажат и да се стават во функција општинските функции и услуги, за нормално функционирање на општествениот живот, и воедно им се дозволува пристап на вработените во општините.
Чекор V, градоначалниците да поднесат оставки до летото оваа година, отворајќи го патот за предвремени општински избори.
Чекор VI, предвремени општински избори да се одржат оваа година.
Чекор VII, ОБСЕ ќе го поддржи изборниот процес, преку техничка поддршка на косовските власти кои ќе ги организираат изборите, зајакнувајќи ја со тоа довербата меѓу заедниците.
Чекор VIII, ОБСЕ ќе ги ангажира младите во програмите и процесите за помирување.
Чекор IX, ОБСЕ ќе ги стави своите капацитети на располагање за поддршка на имплементацијата со добра волја од двете страни на договорените одредби и продолжување на дијалогот.
