Дали сте знаеле дека Франција е една од дваесетте земји во кои се прави проверка дали некоја жена е девица? По повод предлогот за забрана на ваквата пракса, мислењето на јавноста е поделено.
Додека некои активисти во ОН бараат забрана за ваквата „варварска пракса“, други предупредуваат дека положбата на одреден број муслиманки би можела значително да се влоши поради тоа.
Според СЗО, проверка на невиноста на жената се спроведува во најмалку 20 земји во светот. Понекогаш тоа се врши принудно, бидејќи семејството, партнерот или потенцијалниот работодавач го користат за процена на честа или за општествена вредност.
Во Европа, вакви тестови се вршат во Белгија, Холандија, Велика Британија, Шведска и Шпанија. Во Франција проверката на невиност е најчеста пракса меѓу муслиманите, оваа земја има најголем број муслимани во Европа, околу 5 милиони или 7 до 8 проценти од популацијата.
ОН предупредуваат дека ваквите тестови се болни, непрецизни и претставуваат кршење на човековите права, оценувајќи дека за нив нема место во модерното општество.
Но, сите не се согласуваат со ова, некои експерти предупредуваат на непосакуваните ефекти предложени при забраната на проверка на невиност во Франција, која е дел од поширокиот предлог закон за исламски сепаратизам кој ќе биде изнесен пред Парламентот следниот месец.
Според нацрт-законот, претседателот Емануел Макрон предлага казна затвор од една година и парична казна од 15.000 евра за лекарите кои издаваат вакви потврди. Тој закон треба да ја засили секуларната вредност и борбата против исламскиот сепаратизам, смета тој.
Но, како што објаснуваат лекарите, жените би можеле да плаќаат прекумерни надоместоци за илегални тестови или ризикуваат да се соочат со насилно однесување од членови на семејството, без разлика дали станува збор за партнер или роднина, ако немаат доказ за нивната невиност.
Во многу земји ваквите тестови се нелегални, како на пример во САД и во Канада.
