Новак Ѓоковиќ, најдобриот тенисер во светот, беше изненаден од новото правило на УС Опен.
За разлика од Синсинати Мастерс, на њујоршкиот Грен слем правилото за сервирање од 25 секунди е поразлично, односно се мери по завршување на поенот.
На српскиот ас таквата одлука не му се допадна и бурно реагираше кон судијата.
„Ова е смешно, не е нормално“, му се обрати Ѓоковиќ на судијата кој мери време.
Веднаш доби и објаснување.
„Тука почнуваме да одбројуваме откако ќе се објави резултатот, а не откако ќе отидете да си земете пешкири. Поинакви се правилата од АТП турнеите“, му објасни судијата, на големо изненадување на Ноле.
„Ама зошто? Фала што ни кажавте“, иронично одговори Ѓоковиќ.
Ноле го победи Дамир Џумхур со 6:1, 6:4, 6:1 и се пласираше во второто коло на УС Опен.