На Серхио Бускетс многу тешко му падна поразот на шпанската репрезентација од Мароко во осминафиналето на Светското првенство во Катар.
Шпанците загубија на пенали и не успеаја да се пласираат во четвртфиналето.
„Штета што сè беше решено на пенали на најсуров начин. Беше тешко, нè чинеше многу, се обидовме да ги истрошиме, да најдеме простор… немавме доволно среќа со последното додавање. Сега е важна репрезентацијата, не јас. Тешка вечер, но ќе послужи како лекција за нашиот фудбал. Имаме многу млади играчи кои можат да ѝ помогнат на репрезентацијата и треба да продолжиме во истиот дух“, изјави капитенот на „Црвената фурија“.
Многу веројатно дека за 34-годишниот Бускетс ова беше последен мундијалски настап со оглед на тоа што на наредниот Мундијал ќе има неполни 38 години (Мундијалот 2026 ќе биде во јуни и јули, а него роденден му е на 16 јули). Во оваа шпанска репрезентација тој беше последниот претставник од генерацијата која во 2010 се искачи на светскиот трон.
Мароко, за кого ова е историски успех, во четвртфиналето на Мундијалот во Катар ќе се соочи со уште една пиринејска репрезентација, Португалија на 10 декември.