Две недели откако беше потврдено дека Чави ќе продолжи да ги води играчите на Барселона, легендата на клубот и поранешен тренер доби отказ.
Чави е поранешен, а нов тренер на Барселона ќе биде Германецот Ханси Флик.
Чави ја презеде клупата на Барселона во ноември 2021 година и ги предводеше Каталонците на 141 натпревар. Оствари 89 победи, 23 нерешени и 29 порази.
Минатата сезона ја освои Ла Лига и домашниот Суперкуп, а оваа сезона заврши на второто место и беше елиминиран во четвртфиналето на Лигата на шампионите од ПСЖ.
Му пресудија неговите критики кон раководството, односно неговите коментари за финансиската состојба.
„Навивачите мора да разберат дека оваа Барселона не е онаа од пред 25 години. Тоа повеќе не е така, но мораме да го засилиме тимот ако не сакаме сè да остане како што е.
Верувам дека навивачите на Барселона мора да сфатат дека ситуацијата е многу тешка, особено на економски план. Тоа не значи дека нема да се бориме, но ситуацијата е таква што ни треба стабилност и време“, рече тој.
Тие зборови го чинеа отказ, а дека е бивш потврди и самиот претседател на клубот Жоан Лапорта.
Местото каде Чави ја дозна својата судбина е болницата. Имено, тој отишол да го посети Лапорта кој се опоравува од пневмонија и покрај неговиот кревет дознал дека е време да се збогува.
„Кога би се водел по емоциите, би сакал ти и понатаму да бидеш тренер. Разумно е да не продолжиш“, му рекол Лапорта на Чави тој ден.
