Барселона вечерва го игра последниот подготвителен натпревар пред новата сезона, а традиционално е пресметка за трофејот Жоан Гампер.
Противник овојпат ѝ е Пумас УНАМ со Дани Алвеш, 39-годишната легенда на Барса кој минатата сезона накратко се врати во клубот.
Тренерот Чави е полн со позитивни впечатоци од претсезонските натпревари и тренинзите и е презадоволен од кадарот што го има, вклучително и петте новајлии, поради што клубот мораше да заложи пари кои сè уште ги нема, односно да ги продаде телевизиските права однапред за да собере доволно за трансфери.
Полни со ентузијазам
„Тимот е многу добар, имам многу добро чувство кога ги гледам на тренинзите. Сите тренираат добро, тие се во добар ритам, турнејата низ Америка беше многу позитивна. Има многу ентузијазам, тоа се виде и на презентацијата на Левандовски, сите сме многу возбудени“, изјави Чави, а пренесува Marca.
Во однос на минатата сезона неговиот тим е засилен, освен со полскиот напаѓач, и со Рафиња, Франк Кесие, Андреас Кристенсен и Жил Кунде. Покрај тоа, клубот ги продолжи договорите со Усман Дембеле и Серхи Роберто.
„Целта на оваа сезона е да освојуваме титули и да играме добар фудбал. Сакаме да ги израдуваме луѓето затоа што тоа го заслужуваат“, најави Чави и покани што повеќе навивачи на натпреварот со Пумас, „генералката“ пред новата сезона, каде домашната публика ќе има можност за првпат во живо да го види новиот тим.
„Ни требаат луѓе, нивниот ентузијазам е клучен. После неколку години играње за Гампер без навивачи, ќе биде многу позитивно да се игра пред нив. Ќе се обидеме да ги направиме горди на тимот, да се забавуваме. Ќе дадеме сè од себе да бидат горди“.
