Прв неуспех за тимот на Френк Лампард по рестартот на сезоната, додека Лестер никако да се опорави од катантинот.
По трите победи во низа по продолжувањето на сезоната и тоа над Астон Вила и Манчестер Сити во лигата и Лестер во ФА Купот, Челси синоќа првпат потфрли губејќи со 3:2 кај градскиот ривал Вест Хем.
Вилијан од белата точка на три минути пред паузата донесе водство за „Сините“, но домаќините во судиското надополнување израмнија преку Томаш Соучек. Веднаш во вториот дел Мајкл Антонио донесе пресврт за Вест Хем, а со својот втор гол Вилијан во 72. минута израмни на 2:2. Во претполседната минута украинскиот репрезентативец Андриј Јармоленко погоди за големи 3 бода на „Чеканите“.
Вест Хем со оваа победа избега од опасната зона од која сега го делат три бода, додека Челси пропушти шанса да го престигне Лестер на третата позиција и воедно дозволи Манчестер Јунајтед и Вулверхемптон да му се доближат на само три бодови.
Лестер продолжи со лошата серија и на гостувањето кај Евертон на Карло Анчелоти. Домаќините со головите на Ришарлисон и Гилфи Сигурдсон од пенал уште по 16 минути игра направија 2:0, а „Лисиците“ во вториот дел преку Келечи Ихеаначо успеаја само да ја направат завршницата интересна.
Веќе четврти натпревар по рестартот како Лестер не знае за победа, а нанижа две нерешени и два пораза, од кои еден во ФА Купот, со што си го доведе во опасност местото кое води во Лигата на шампиони.
Арсенал го преслуша Норвич декласирајќи го со 4:0. Плер-Емерик Обамејанг постигна два гола, додека по еднаш погодија Гранит Џака и Седрик Суареш. Норвич останува закован на дното и со една нога е веќе во Ченпионшип.
Изненадувачки висока победа оствари Њукасл на гостувањето кај Борнмут. Двајт Гејл, Шон Лонгстаф, Мигел Алмирон и Валентино Лазаро донесоа водство од 0:4 пред Ден Гослинг во судиското надполнување да постигне почесен гол за домаќините.