Дали Кристофер Колумбо навистина бил од Џенова, денешна Италија? Или бил Шпанец? Или, како што сугерираат други теории, бил Португалец, можеби Грк, па дури и Полјак?
Мистеријата околу за потеклото на славниот истражувач можно е да биде решена за пет месеци, бидејќи меѓународни научници вчера започнаа да ги анализираат неговите ДНК остатоци, со надеж дека ќе ги идентификуваат неговите корени.
Заклучокот од анализата се очекува во октомври.
Малку е познато за раните години на славниот морепловец од 15 век. Важен напредок во создавањето на поцелосен профил на истражувачот кој починал пред 515 години беше постигнат во 2003 година кога ДНК анализите потврдија дека коските закопани во гробница во Севилската катедрала се навистина на Колумбо.
Но, по тој наод, група истражувачи од Универзитетот во Гранада, спроведувајќи го истражувањето, ја прекинаа истрагата. Причината беше што тогашната ДНК технологија не беше точна, ниту веродостојна и бараше големо количество генетски материјал.
Но, во меѓувреме, науката направи голем напредок. Хосе Антонио Љоренте, професор по медицинска форензика на Универзитетот во Гранада, вели дека имало „радикално подобрување“ во ДНК анализата, па сега е можно да се анализираат многу мали фрагменти од примероци.
„Добив десетици агресивни мејлови во кои ме прашуваа зошто престанавме да истражуваме. Бараа да ја откријам ‘тајната’ за потеклото на Колумбо“, рече водачот на проектот, Љоренте, на онлајн прес-конференција.
„Ех да можевме да го утврдиме тоа пред најмалку 16 години, но тогаш ја немавме потребната технологија. Науката не е наука ако не ги исполнува максимално неопходните услови“, додаде тој.
Истражувачите во моментов работат на четири парчиња коски од Колумбо, седум остатоци од коски, забот на неговиот син Хернандо и исто така на десетина фрагменти од коски на неговиот брат Диего, кои се во лоша состојба.
Овие остатоци ќе бидат испратени на генетска идентификација во лабораториите во Рим и Фиренца во Италија и во лабораториите во Мексико и САД, иако истражувањето се координира од Гранада.
„На тој начин, процесот на работа ќе биде независен. Нема да има поврзаност помеѓу овие лаборатории за да се зачува објективноста на наодите. Кога сите ќе завршиме, ќе ги презентираме заклучоците на маса“, објасни Љоренте.
Тој лично верува во општо прифатената теорија дека Колумбо бил од Џенова, но додава дека проектот има за цел да реши некои „загатки и противречности“ во историската приказна и да добие „што е можно повеќе информации за да не може повеќе да се дискутира“ за потеклото на Кристофер Колумбо.
Како вовед во работата, Универзитетот во Гранада беше домаќин на научници во средата, она што Љоренте го нарече „првиот состанок на светот на истражувачи од Колумбо“, кој изнесе разни теории за неговото потекло.
Патувањата на истражувачи во странство во име на шпанската монархија од 1492 и 1504 година ја отворија вратата за европска колонизација на Америка, што Европејците тогаш го нарекуваа „Нов свет“.
Колумбо починал на 20 мај 1506 година и бил погребан во манастир во шпанскиот град Ваљадолид, иако наводно сакал да биде погребан во Америка. Од Ваљадолид, неговите посмртни останки биле префрлени најпрво во Севилја, потоа во Доминиканската Република, потоа во Куба и на крајот повторно во Севилја.
