Кристијан Ериксен е стабилен и неговата состојба е под контрола по вчерашниот шокантен пад на мечот меѓу Данска и Финска во рамките на 1. коло од групата Б на Европското првенство.
Данскиот репрезентативец колабира во 43-та минута од натпреварот и целиот свет во живо ја следеше борбата на лекарите за неговиот живот. Неговите соиграчи Јоаким Мехле и Симон Кјер први му пријдоа на помош, а до него веднаш притрчаа лекарите на данската репрезентација предводена од Мортен Босен.
„Кога стигнав до него, тој лежеше на страна, дишеше и почувствував пулс. Но, тогаш сè престана. Почнавме да го реанимираме и по неколку минути, со помош на други лекари, успеавме. Пред да отиде во болница разговараше со мене додека беше на носила“, рече Босен.
*Внимание! Содржината на видеото може да ве вознемири!
УЕФА подоцна објави дека Ериксен е стабилен и дека неговата состојба е под контрола. Го слушнаа и неговите соиграчи кои кога се уверија дека е добро, во договор со своите фински колеги, решија да го продолжат натпреварот, кој на крајот Финска го доби со 1:0.
„Јасно е дека е практично невозможно да се игра нормално по она што го видовме. Но, моите играчи беа неверојатни. Им се восхитувам што се вратија на теренот и го играа натпреварот до крај. Тие едноставно не сакаа да останат будни цела ноќ и потоа да утрото да седнат во автобус и да одиме да ја продолжиме играта. Сакавме да ја завршиме таа приказна“, рече данскиот тренер Каспер Хјулманд.