Голманот на Ливерпул постигна гол со глава длабоко во судиското надополнување и го остави својот тим во игра за пласман во Лигата на шампионите.
Алисон е херој на Ливерпул, но не поради неговите одбрани. Овој пат бразилскиот голман мораше да се префрли пред противничкиот гол и да земе нова улога, улога на голгетер, да ја затресе противничката мрежа и да ја заврши работата на своите колеги кои не успеаваа да го најдат патот до мрешата на Вест Бромвич Албион.
Лошата сезона на Ливерпул добива чудесна завршница. Тимот на Јирген Клоп од борба за титулата се префрли во борба за место во Лигата на шампионите откако имаше нестварно лоша серија на средина од сезоната. Така, „Црвените“ се доведоа до ситуација во последните неколку кола секој натпревар да им е како финале, а воедно и да зависат од резултатите на притивниците.
Синоќа Ливерпул ја запиша третата последователна победа, победа со која сега е само еден бод зад тоа 4. место на кое лежи Челси, место кои води во елитата на европскиот фудбал.
А спасител синоќа беше играч од кој никогаш не би се очекувал гол со оглед на тоа што неговата задача е да ги спречува противниците да ја затресат ливерпуловата мрежа. Бразилскиот голман Алисон Бекер никогаш во кариерата немаше постигнато гол, а вчера тоа го направи кога беше најпотребно.
Во 5. минута од судиското надополнување Трент Александер-Арнолд изведуваше корнер, а Алисон го претрча целиот терен во очаен обид да му помогне на својот тим. Домашните фудбалери го оставија без чувар, потценувајќи ги неговите способности, а тој најдобро го искористи таквиот подарок и со глава заби во мрежата на неговиот колега, немоќниот Сем Џонстон. Резултатот на семафорот означи 1:2, а набрзо следуваше и последниот свиреж на главниот судија.
Алисон дефинитивно секогаш ќе го памти вчерашниот ден и поројниот дожд на „Д Хоторнс“ стадионот во Вест Бромвич. Воедно, тој стана првиот голман во историајта на Ливерпул кој постигнал гол на официјален натпревар во било кое натпреварување. Голот му го посвети на својот татко Жозе Бекер кој почина во февруари годинава откако се удави при пливање.
28-годишниот Алисон во Ливерпул е од летото 2018 година кога дојде од редовите на Рома за која настапуваше две сезони. Кариерата ја почна во Интернасиунал од каде и дојде на Стариот континент.