По серијата трагични вести за погодените подрачја од земјотресот во Турција, ни стигнува и една добра. Тричлено семејство е извлечено од урнатините во турскиот Кахраманмараш, 73 часа по катастрофалниот земјотрес.
Спасувачките тимови на градот Сакарија и општината Испарта биле испратени на локацијата откако се слушнал звук од рушевините на една седумкатница.
По макотрпните обиди, спасувачките тимови успеале да дојдат до Али Багиш (55), неговата сопруга Зелал Багиш (40) и нивната 5-годишна ќерка Мир Берзан Багиш, известуваат турските медиуми.
Нивната состојба е добра, а семејството Багиш им се заблагодари на сите кои учествувале во акцијата за спасување.
„Добро е што постојат. Бог да ги благослови сите. Никој не може да се оддолжи за љубезноста на овие луѓе и нивната тешка работа. Тие спасуваат човечки животи. Мое сочувство до нашата земја. Стоиме со нашите браќа, срцето на Турција чука овде”, изјави градоначалникот Екрем Јуче.
Турските медиуми пишуваат дека од повеќе срушени згради може да се слушнат гласови од луѓе кои се заглавени внатре. Спасувачките тимови работат за да дојдат до нив, но времето не е нивен сојузник, а шансите за преживување се намалуваат со секој час.
