„Православните христијани утре празнуваат Задушница, а в недела го празнуваат слегувањето на Светиот Дух на Апостолите, или помеѓу граѓаните познат како Духовден“, напиша министерот за внатрешни работи.
Наќе Чулев на својот Facebook профил се огласи по повод бројните реакции на незадоволните граѓани поради повторното водедување на целосен тридневен полициски час.
„Оваа година овие два големи и значајни празници ги одбележуваме во поинакви околности соочени со голем, значаен и сериозен предизвик – да го заштитиме сопственото здравје од вирусот COVID-19“, пишува Чулев.
„Свесен сум дека актуелната одлука за ограничување на движењето на граѓаните не е идеална, но таа треба да се почитува. Големата бројка на лица кои се носители на вирусот е факт кој не смееме да го игнорираме и занемариме. Но, таа бројка нѐ обврзува и сите нас кои сме носители на јавни и политички функции, одлуките кои ги носиме да бидат засновани на аргументи, а не на дневна политика, посебно оние одлуки кои се поврзани со заштита на здравјето на граѓаните“.
„Сите ние сме одговорни за своето, но и за колективното здравје. Апелирам до граѓаните да ги почитуваат мерките за ограничување на движењето. Дисциплинираноста и одговорноста се карактеристики на големите луѓе и јас сум сигурен дека пред нас е време кога ќе можеме многу посигурно и побезбедно да ги одбележуваме убавите моменти, но и да изразуваме почит на оние кои не се помеѓу нас“, заврши тој.
