Министерот за внатреши работи Наќе Чулев преку неговата официјална Facebook страница им се заблагодари на вработените во МВР кои даваат исклучително голем придонес во справување со пандемијата со COVID-19.
Тој исто така извести дека денеска ја потпишал и ќе ја достави до Владата уредбата со која се предвидува награда од 15.000 денари линеарно и еднократно за секој од нив.
„Уредбата ги опфаќа сите полициски службеници, вработените во управните служби и останатиот административен персонал во Министерството за внатрешни работи кои целиот овој период неуморно и пожртвувано даваат се од себе во првите редови во справувањето со коронавирусот“, напиша Чулев.
Понатаму тој вели дека нема „никаква дилема дека тие со својот труд и ангажман го заслужуваат ова“ и дека очекува Владата на првата наредна седница да ја усвои оваа уредба.
„Здравјето и животот на вработените се наш исклучителен приоритет и цврсто сме посветени на процесот на вреднување на нивниот придонес во остварување на целите на Министерството за внатрешни работи“, додаде Чулев.
