Грчкиот тенисер Стефанос Циципас (4. АТП) се пласираше во финалето на Австралија опен откако рано утринава го победи Русинот Карен Хачанов (20. АТП).
Натпреварот траеше речиси 3 и пол часа, а резултатот на крајот гласеше 3:1 за Циципас, по сетови 7-6, 6-4, 6-7, 6-3.
По успешните први сервиси, двајцата играчи направија брејк во четвртиот и петтиот гем. Истото се повтори и во осмиот и деветтиот гем, па се играше тај-брејк. Во една игра на нерви Стефанос направи три мини-брејка и поведе на овој дуел.
Во вториот сет и двајцата тенисери значително ги подобрија сервисите и немаше грешки до деветтиот гем, кога Гркот прави клучен брејк, кој потоа го потврди со својот сервис, со што дојде на чекор до победата.
По третиот гем од третиот сет, кога Циципас направи брејк, се чинеше дека Хачанов целосно потфрли. Сепак, Русинот покажа карактер и зеде брејк во 10-тиот гем - за израмнување. Се одигра нов тај-брејк кој сега му припадна на Карен, а рускиот тенисер на тој начин се врати во игра.
Сепак, тоа не го погоди Гркот кој веднаш во четвртиот сет направи брејк за водство од 3:0. Следуваа сервисни размени без проблеми, па Циципас мирно го приведе натпреварот кон крајот и забележа победа на денешниот дуел.
Циципас во своето прво финале на Австралија опен ќе игра против победникот од второто полуфинале меѓу српскиот тенисер Новак Ѓоковиќ (5. АТП) и Американецот Томи Пол (35). Второто полуфинале се игра денеска од 9:30 часот.
Доколку Ѓоковиќ се пласира во финалето, тоа ќе биде повторување на Ролан Гарос од 2021 година, кога во борбата за титулата се сретнаа српскиот тенисер и Гркот. Тогаш славеше Ѓоковиќ по голем пресврт.
