Речиси половина од сите хотели во Црна Гора се затворени поради епидемијата на COVID-19 и прашање дали воопшто ќе отворат сезонава.
Во Црна Гора, земјата која тамошните власти до скоро ја промовираа како „дестинација без корона“, не може да влезат туристи од повеќето земји од регионот, ни патници од ЕУ, па сосема логично е што се откажани бројни резервации за сместување и авионски превоз.
Податоците со кои располага Стопанската комора на Црна Гора покажуваат дека во Жабљак не е отворен ниту еден хотел, а исто е и во Колашин, додека во приморскиот крај ситуацијата варира од град до град.
На територијата на Општина Будва работат само 50 хотели, додека во Тиват уште не се отворени сите хотели и не се очекува значителен промет бидејќи традиционално, најголемиот број од туристите доаѓаат од земјите кои се на „црвената листа“.
Во Бар се отворени 23 хотели, додека во Херцег Нови само 13 од вкупно 41 регистриран објект.
Приватните капацитетите речиси и не почнаа да работат сезонава, а прашање е дали воопшто ќе ги отворат вратите за туристи ова лето.
Оние хотели кои работат имаат гости, но главно домашни туристи, најмногу од Подгорица. Резервациите најчесто се прават непосредно пред да се тргне на патување, што значително ги отежнува проценките за тоа како ќе се одвива остатокот од сезоната.
